Ungmennadeild BFSÍ er tilraunaverkefni sem sett var á fót til að gefa yngra íþróttafólki vettvang til þess að kynnast keppnisfyrirkomulagi í íþróttinni og færi á því að keppa sín á milli um land allt án tilheyrandi ferðakostnaðar. Ekkert keppnisgjald er til að taka þátt á meðan deildin er á tilraunastigi.

Íþróttafélög taka þátt í deildinni með því að halda keppni fyrir sína iðkendur og senda svo skorblöðin til BFSÍ fyrir lok mánaðarins. Félögunum er velkomið að hafa keppnina eins formlega eða óformlega og þeim lystir svo lengi sem öllum reglum er fylgt. Ekki er nauðsynlegt að dómari sé viðstaddur til að votta keppnina heldur dugar að fulltrúi félagsins votti skorblöðin – hafið þó í huga að ekki er hægt að sækja um íslandsmet nema að dómari með virk réttindi hafi verið viðstaddur og kvittað á skorblaðið.